Jukujukukurlangukurlu Mangarrikirli
Warlpiri

Jukujukukurlangukurlu Mangarrikirli
Warlpiri
SUMMER INSTITUTE OF LINGUISTICS
DARWIN
1983

NATIONAL LIBRARY OF AUSTRALIA
Cataloguing-in-publication Data
Jukujukukurlangukurlu mangarrikirli.
Warlpiri translation of: The little red hen.
For children.
ISBN 0 86892 253 6.
1. Warlpiri language - Readers. I. Summer Institute of Linguistics. II. Title: The little red hen.
499.15
SUMMER INSTITUTE OF LINGUISTICS 
ISBN 0 86892 253 6

PREFACE
Nyampuju yimipala yirramu Warlpirikirra Valerie Napanangkarlu manu Hazel Napangardirli Lajamanuwardingkijarrarlu, kuja kapala warrki jarrimi Wirikirlangurla Pina Jarrinjakurlangurla Lajamanurla.

Nyurruwiyi ngurrangka jintangka kalalu nyinaja jukujuku, jipilyaku, minija, manu ngurngurrpa. Parrangka jintangka jukujuku yanu wirlinyi mangarrikipurda. Kujalpa yaninja yanu, parlu pungu ngurlu walyangka.
Wangkaja nyanu, "Wara! Kapurna milyingka yirrarni nyampuju ngurluju walyangka, kajiji pardimi mangarrilki. Nganajarrarlurlujarra milyingka yirrarni?"

Ngulajangka wapalnyanja yanulparla jipilyakuku. Kuja nyangu jipilyaku, japurnu, "Nyangka nyampu ngurlu kujarna parlu pungu. Ngalijarrarlu mayirli milyingka yirrarni?"
Wangkajarla jipilyakuju, "Lawarna, nyuntulurlu milyingka yirraka jintangku. Ngaju karna yani manyukurra.”

Ngulajangka wapalnyanja yanulparla minijakulku. Kuja nyangu minija, japurnu, "Nyangka nyampu ngurlu kujarna parlu pungu. Ngalijarrarlu mayirli milyingka yirrarni?"
Wangkajarla minijaju, "Lawarna, nyuntulurlu milyingka yirraka jintangku. Ngaju karna yani yawukurra."

Ngulajangka wapalnyanja yanulparla ngurrngurrpakulku. Kuja nyangu ngurrngurrpa, japurnu, "Nyangka nyampu ngurlu kujarna parlu pungu. Ngalijarrar1u mayirli milyingka yirrarni?"
Wangkajarla ngurrngurrpaju, "Lawarna, nyuntulurlu milyingka yirraka jintangku. Ngajulurlu karna ngarni nyampu ngakurru manu kapurna yunparni purlapa."

Ngulajangka yaninjarlalparla pangumulku walya jukujukurluju.
Kuja milyingka yirrarnu, wangkaja nyanu,
"Lawajukujulu wiyarrpa mamparlpungu. Kularlijarra nganajarrarlu yirrarni."

Ngula wita ngurlu ngulaju rdurlpardija muku, manu pardija panukurlulku ngurlukurluju ngarninjaku. Ngulajangka nyanungurlu jukujukurlu yaninjarlajana japurnuyijala, "Nganajarrarlujarra yani kajirlijarra pajirni ngurlu?"
Wangkajarla jipilyakuju, "Lawarna, ngajuju kapurna nyina."
Wangkajarla minijaju, "Lawarna, ngajuju kapurna nyina."
Wangkajarla ngurrngurrpaju, "Lawarna, ngajuju kapurna nyina. Yampiyanganpa nganimpaju!"

"Ngulajuku kapurna ngajulurlujuku pajirni jintangku," wangkajajana jukujukuju.
Jungajuku yanu mangarrikirra pajirninjaku. Pajurnu ngurluju junmakurlurlu.

Kuja pajurnu muku ngurlu, nyanungurlu jukujukurlu yaninjarlajana japurnuyijala, "Nganajarrarlurlujarra yurrparni nyampu ngurluju?"
Wangkajarla jipilyakuju, "Lawarna, ngajuju kapurna nyina."
Wangkajarla minijaju, "Lawarna, ngajuju kapurna nyina."
Wangkajarla ngurrngurrpaju, "Lawarna, ngajuju kapurna nyina. Yampiyanganpa manyu karrinjakurra!" Ngulajangka yaninjarlalpa jintangku yurrparnu jukujukurluju, kujalpalu panukariji manyu karrija manu ngarlarrija.

Kuja yurrparninjarla ngurlu yirrarnu, yaninjarlajana japurnuyijala, "Nganajarrarlujarra yani yungurlijarra nyurlami nyampu mangarri?"
Wangkajarla jipilyakuju, "Lawarna, ngajuju kapurna nyina."
Wangkajarla minijaju, "Lawarna, ngajuju kapurna nyina."
Wangkajarla ngurrngurrpaju, "Lawarna, ngajuju kapurna nyina. Yampiyanganpa nganimpaju!"
Jungajuku yaninjarlalpa jintangku nyurlaja jukujukurluju.

Kuja mangarri nyurlanjarla yirrarnu, yaninjarlajana japurnuyijala, "Nganajarrarlurlujarra purrami nyampu mangarri?"
Wangkajarla jipilyakuju, "Lawarna, ngajuju kapurna nyina."
Wangkajarla minijaju, "Lawarna, ngajuju kapurna nyina."
Wangkajarla ngurrngurrpaju, "Lawarna, ngajuju kapurna nyina. Yampiyanganpa nganimpaju!" Ngulajangka yaninjarlalpa jintangku purraja mangarriji warlungkaji jukujukurluju.

Kuja mangarri yurnmi jarrija, jukujukurluju wilypi manu warlujangka. Parntijalpa ngurrjunyayirni. Ngulajangka wangkajarla jipilyakuju jukujukukuju, "Ngalijarrarlu mayirli ngarni ngulaju ngurrjunyayimi mangarri?"
Manurla wangkaja minijaju, "Ngajurlangurlu mayirna ngarni ngulaju ngurrjunyayimi mangarri?"
Manurla wangkaja ngurrngurrpaju,
"Yarnunjukunyayirnirna, ngajurlangurlu mayirna ngarni ngulaju ngurrjunyayirni mangarri?" Jukujukurlujujana mamparlpungu, "Yampiyajulu ngajuju! Kapurna jintangkujuku ngarni!"
Jungajuku jintangkujuku muku ngarnu!

POSTFACE
This story is a Warlpiri rendition of the English folktale 'The Little Red Hen.' It was translated into Warlpiri by Valerie Napanangka Patterson and Hazel Napangardi Rose with the assistance of members of the Summer Institute of Linguistics working at Lajamanu in the Adult Literacy Centre.

SUMMER INSTITUTE OF LINGUISTICS 
AUSTRALIAN ABORIGINES BRANCH 
DARWIN 
200/1.83