Nakudji Namarladj Ngiwkmihngiwkmirey.
Dolly Maralngurra.
Bim- Andrew G. Manakgu.

NAKUDJI NAMARLADJ NGIWKMIHNGIWKMIREY
Kunkare kohbakohbanj birrihyolyolmi nakudji wurdyaw nalkbuhnalkbuni, ngalyod binguneng. Birrikaybom manburrangkali, manmekbe manu manjbekkang manmanjmak duninj.

Wanjh kumekbe kunu kunnalkmey, wanjh nalkbuhnalkbuni mungoyh. Wanahwam, wanjh ngalkudji ngalkohbanj bidjawam, "Njalekah wanjh yihnalkbun?" Wanjh yimeng nawu namarladj, "Aba manburrangkali ngandikaybom." "Kek," yimeng ngalbu ngalkohbanj.
Wanjh wam ngalbu ngalkohbanj, wam yaldanj bihmarnemangi. Bimarnemey barlkeng, dja nungan rerre ngiwkmihngiwkmiyoy nawu namarladj. Dja ngalengman wanjh barlkeng, kumyirrurndi manbu yaldanj.
Kumwam kurrmeng manbu yaldanj, dja wam kunrerrng mey, kumdurndi worrhmeng, wanjh kinjeng rowk, djolengminj wanjh bikayhmeng. Yimeng ngalbu ngalkohbanj, "Yimray yingun manih yaldanj." Kumhdi, yimeng nawu namarladj, "Ngaye ngawarnyak makka yaldanj, minj ngadjare."

Wanjh mungoyh nalkbuni. Wanahwam wanjh nabuyikawali dolkkang wam mankung baruy. Kumyirrrndi bibukkang, "Yimray yingun mankung." Nawu namarladj kumhdi, yimeng, "Ngawarnyak nakka mankung, minj ngadjare." "Kek," yimeng nawu bininj. "Bonj wanjh, yihdjalnalkbu nguddanu dja kanbadmarne-wanjbawong."

Wanjh ngiwkmihngiwkmiyoy mungoyh. Wanjh ngalbuyikawali dolkkang, yimeng, "Kab ngaray ngamarnebun karrbarda, dja marndi mungoyh kahnalkbun." Wanjh wam, wam bimarnebom manu karrbarda, barlkeng wanjh kumyirrurndi, kukkurrmeng manu karrbarda, dja wam kunrerrng, kumdurndi wanjh worrhmeng, wilkdi manu karrbarda, ruy djolengminj, wanjh bikayhmeng, yimeng, "Yimray, yingun karrbarda." Kumhdi, yimeng nawu namarladj, "Ngaye ngawarnyak makka karrbarda." "Kek," yimeng ngalbu ngalkohbanj.

"Bonj wanjh," birrimanieyimeng, yihdjalnalkbu nguddanu, dja yibadbawong manu karrbarda dja mankung, dja yaldanj, dja manmekbe manu yihmanjburrbun mungoyh manburrangkali.
Wanjh birrimarneyimeng nawu kumekbe birrihni birriwern kohbakohbanj,
"A nuk yinalkngurdmen, njale wanjh mungoyh yihnalkbun? Bolk kankukngun ngalyod."

Birrimarneyimeng, dja nungka minj nalkngurdmeninj, dja mungoyh djahdjalnalkbuni. Djahdjalnalkbom, djahdjalnalkbom, djahdjalnalkbom, wanjh ngalyod ngalbu ngalkang Miya kunred kakbibeh, bibekkang kahnalkbun nawu namarladj mungoyh.
Wanjh kodjdolkkang ngalbu ngalyod, bolknahbolknani kuyinbengyirranginj, bekkang kurih walem Mayawunj kahnalkbun, wanjh ngalbu ngalyod yimeng, "Ngaray wanjh walem kumekbe ngabenngun."
Wanjh dolkkang wam ngalbu ngalyod kanjdji yibmeng, rengehrey benhkuniyikani. Wanahwam darnkih bebmeng bedberre, wanjh kodjdolkkang ngalbu ngalyod bennang.
"A", yimeng, "naninjnanu nawu kahnalkbun namarladj kure kabirrihni."

Bonj baldjalkunibebmeng namekbe bedberre, birrikuyinbolknang kakbi, birrinang yiman kayime kunak benhwolkani, wanjh birrikelewawmeng.
Wanjh bindimarneyimeng nawu binihbininj, "Ngurriyamen werrk marndi kankukngun." Wanjh birriyahyameng yimankek birriwarrehwarrewong, wanjh birriyimeng, "Bonj wanjh kankukngun kadberre."

Wanjh yimankek birrikuyinkelelobmerrinj ngalyod bennanganang, kunberd bendukkang rowk, namekbe namarladj dorrengh warreh. Wanjh namekbe nanu dokmeng bikodjbayeng, yibeng rerre nawu birribuyika benhkuknguni. Wanjh worrkminj ngalbu ngalyod ngalkang Miya.
Kumekbe Mayawunj wanjh kanjdji benyiyibmeng, kabenhyiyo kumekbe walem Mayawunj.
Wanjh bonj.

The production of this Kunwinjku (Gunwinggu) story is part of the Oenpelli Literary Project assisted, by the Australian Council for the Arts. ©
C.M.S.	OENPELLI N.T. 1974
D M 9/74.