Ḏi  122
        
All Right Reserved
Text (C) Shepherdson College 1986
Illustration (C) Galiwin'ku Literature Production Centre 1986
1988

Ḏi	122
illustrated by 
P. Wadaymu
written by 
B. Marrŋanyin
We Acknowledge the Aboriginal Arts Board Contribution 

Waŋganymirr waluy märrma’ ḏilak maṉḏa marrtji beŋur bala wiripuŋur wäŋaŋur bala Ŋarritjkal ga Bilinydjan’kal wäŋalil.  

Ga waŋa maṉḏa maṉḏany bitjarr,
“Maṉḏa, nhämirr balaŋ nhuma linyalaŋgal gurrupul biḏitj wärriku’ yän linyu dhu bala marrtji marraṉḏillil.”

Ga ŋayiny maṉḏany dhä-birrka’yurr Bilinydjan’thuny,
“Nhaku nhuma dhu balany marrtji marraṉḏillilnydja?”
Ga maṉḏany nhanukal lakaram, “Be muka maranydjalkku linyu dhu marrtji dhuwal.” 

“Waḏutja nhuma biḏitji linyalaŋgal gurrupul ŋayi dhu dhuwal gapun ŋurrithirr.”

Bala maṉḏa Ŋarritjthuny ga Bilinydjan’thuny gurrupanna maṉḏaŋgal biḏitj’tja.  

Bala maṉḏa marrtjin.  

Marrtjiny maṉḏa ŋunhi dhunupan yarrupthunna yan marraṉḏillila.  

Yaryun maṉḏa amrrtji maranydjalkku, bäyŋu maṉḏa ŋula waŋgany dharpuŋ.  Bala maṉḏa roŋiyirra.  
Marrtji maṉḏa, nhäma maṉḏa guḻun gapu moṉuk ŋayi ga bulyun.  

Bala maṉḏa dhunupan yan waḏapthunna.  

Ŋayiny ŋunhi waŋganydhuny bäyŋu nhäŋu ŋunhi guṉḏa, ga ŋunhili guṉḏaŋur ga djuḻuḻ’yun guṉḏirrŋani.  

Bala ŋanya ŋuriŋiyiny dhika bäy yan djawar’yun ḻuku waŋgany, bäynha ga yatjun.
“Yaka---ay ŋama’, guṉḏirrŋaniŋdhu ŋarrany ḻuku djawar’yurr,”
bitjanna ŋayi ŋunhi waŋany.  

Bala ŋayi wiripuyndja ŋuriŋiyiny ḏilakthu ḻaw’maraman ŋanya, bala gäma bala mirritjin’ mirrilila wäŋalil.  

Gäman ŋayi marrtji ŋanya-a-a, bala ŋayiny nhäman maṉḏany waŋganydhuny balanday, ga waŋa ŋayi maṉḏany bitjan,
“Way maṉḏa, djäl nhuma ŋarra dhu nhumalany guŋga’yun.

Ga ŋayiny waŋganydja waŋa bitjarr,
“Ŋe marrkapmirr, guŋga’yurr linyalany.  Bili ŋarra gan dhuwal barrkuŋur ŋanya gäŋal.  Dhunupan watjpillila linyalany nhe dhu gämany.”
“Manymak. Ŋarra nhumalany dhu gäma.” bitjarr ŋayi ŋunhi balandany waŋa.  

Gäma ŋayi maṉḏany ŋunhal.  Bala ŋayiny yapaynydja marrtjin guwatjmanna walalany.  
Bala ŋayi waŋan, “Nhaltjarr dhuwandja yolŋu?”
Ga ŋayiny ŋuriŋiyi balandanydja ḻakaraŋal nhanukal bitjarr, “Dhuwali ḻuku ŋanya djawar’yurr guṉḏirrŋaniŋdhu ŋunhal marraṉḏilŋur.

Bala ŋanya ŋayi ḻukuny garrwi’yunna bänditjthun, ga wiripuny ŋayi ŋanya djawar’yun djaktjindhu.  

Ga märrma’ munha ga märrma' walu ŋayi rirrkthundja, bala manymakthirra.  

Ga yakan ŋayi buluny marrtji marraṉḏillil ŋunhala bili ŋayi ga nhina wäŋaŋurra yan.  Bili ŋayi marŋgithirra ŋurikiny marraṉḏilwuny.