143  ŊATHA, GA DHARPA, WARRAKAN GA MAYPAL GA GUYA

Djoma

Dhuwala napurru ga nhina dharpaŋura djaṉ'paŋura märrma'ŋura, märrma' maṉḏanha dhuwala ŋanapurru ga nhina ga ŋunha bala walala ga buḻ'yun dopulu ga waŋganyŋu dhuwala ga dharpa dhärra nhawi gulu, ŋuli napurru ŋuli ga djäma lipalipa ga waŋganyŋu baḻkpaḻk, ga waŋganyŋu dhuwala muymuluŋu ga wiripu ŋunha ḏeṯi ga dhuwala waybalun ga dhärra ga dhuwala wiripu ga dhärra guḏirri dhukarrŋura ga dhärra, ga ŋunha bala marrtji dhärra baralawurru dhaŋgi mala, maypiny ga gumurrkurru marrtji dhärra ḏärrtjal mala maṉḏa rrambaŋi gunga, ga dhuwala burgu ga buma ṉarraṉi ŋäthilimirriyama ga ŋayi dhu ŋurru-djuḻ'yurru napurru dhu nyaŋ'thurru ṉarraṉi, djirrŋiriny, munydjutj, baḻga (ḏangaba muka), bamaraŋ, buṉdjuŋu nhawi wiripunydja yamany ga gurrbuluwuy nhawi wiṉiŋgirri ga boḏaŋ, galun, djiṯama, gulaka, ḻuwiya, ga ḏiltjipuy nhawi ruŋi, gulbaruŋ, yuluk, wanydjalbu ga waŋganyŋu ŋunhi ḏuyŋa yindi ga waŋganyŋu ḏuyŋa nhawi yäku ŋuḏurr, wanydjalbu lamangu nhawipuy dhuḏipuy ga gandarrlili nhawi goŋ-gurthamirri ga ŋunhi garrwarpuydja ga ṉiwuḏa galpaṉ ga ŋunhi ḏumurrunydja ga yarrpanynha. Balanya bäpi wakinŋu bäpi ḏarrpa goŋmirri gunburru warrbaṉwa ga waŋganyŋu bili ḏiltjipuy gunuŋu guṉinymiya ga waŋganyŋu nhawi rramiya balanya ŋäthiliŋu yäku mala, ŋäthili ŋuli ganha ḏilkurruy ḻakaranha.  Ŋäthiliŋu ŋunhi yäku yuwak, ga dhuwalanydja ŋuli ga bukmakthu ḻakarama ga bäpina yäna, ga waŋganynha ga yäku maḻŋ'thun ŋayinydja dhuwali ŋarra marrtjina yäku ḻakaraŋala.  

Ŋunha ga ganydjarr buna ga worrutj maṉḏa nhawi giḻawuṉ ga nhawi wirrtjay balanya, nha ŋunhi ŋarra ganarrthara warrakan balanya nhawi guthin gurrpuluwuy ḏiltjipuydja barkuma ga nhawi wiripu baḏi'paḏi gandabulnha yimdina ŋunhi garrtjambal, gandayala, maḻwiya, nhawi muka gumbaḻ balanya ga ŋatha ŋunhi gumbaḻgu ga wurrdjara ga waŋganyŋu ga nhawi warraga, ga waŋganyŋu ŋayi dhu yarrgupthun ŋunha---a ḻarrtha'kurru dhu marrtji ḻuka manhdhapiḏi ga waŋganyŋu nhawi nhanŋu ḏäŋgan ŋatha wiṉiŋgirri nhäkurru ŋayi dhu marrtji gumbaḻ ga gandji guḏurrku, buwaṯa, muthali, ŋawarramu, bandanyirnyir, baṉḏamal'paṉḏamal djiṉ'tjiṉ, guḏiṯi, barkiki, dhamin nhawi ŋunhi muka waymuŋbi wiripu balanya gaŋurrk, dhukitjmirri, ḻanda, marawa, minhala, bulukminy, wärrkmany, dhuṉum, gurrkaṉaŋarr nhawi gubidji nhawi wiripu ŋarra moŋala meṉḏuŋ dhakal gaḏayarrŋu, nhawi mirriwa, dabagalap, ḏilkam, meṉḏuŋ balanya ga ḏuyŋa, wurrtjara, baḻgurr, djaṯam, wakinŋu ga buthuŋu wakinŋu maḏakarrtji.  Ritharr mulmu yurru yäku ritharr ga mukuluk mulmu ḏärrtjal mulmu gunbuku ŋunhi yurru mulmu wultji'wultji mulmu mala dhuwali bukmak yäku mala ŋarra marrtjina bili ḻakaraŋala.  Bilina dhawar'yurrunana.

CD LIBRARY OF YOLŊU LITERATURE 
FOR STUDY PURPOSES ONLY
USED WITH PERMISSION