Anemlen Stori Danny Marmina Jentian Anemlen Stori Danny Marmina Jentian Published by Bamyili Press. P.M.B. 25, Katherine, N.T. 5780 Copyright Bamyili Press 1977 ISBN 0 86822 006 X Preface Anemlen Stori is a collection of stories in Kriol about people written, told, edited and illustrated by Danny Marmina Jentian of Bamyili. Anemlen Stori is intended to provide reading material for people literate in Kriol, a language spoken by more than 2000 Aborigines in the Bamyili and Roper River areas of the Northern Territory. Note to Readers There is one new 'letter' used in this book: The letter e with two dots after it (e:) is like the ir sound in the English word turtle or the ur sound in the English word church. For example, te:tul and dje:j. Wanim Iya Stori Neim Peij Namba Rabiswan Te:tul Stori 1 Stori Bla Krogidail 7 Stori Bla Tubala Olmen 13 Fobala Yangboi 21 Stori Bla Gudubu 27 Stori Bla Yang Brolga 33 Ista Holadei 39 Rabiswan Te:tul Stori Wantaim dijan shodnek mami te:tul bin digim hol en berimab ten eig bla im en imin gobek langa woda, en imin weit deya til imin rait taim bla gobek luk bla im ala eig. Burrum jeya wen jad lot eig bin reidi bla ala lilwan lilwan te:tul bla kamad, jad lot lilwan lilwan te:tul bin godan langa woda en logobat bla olabat mami en debin faindem. Jad majawan te:tul bin kandem blanga im ola lilwan, bat oni naien bin deya en wanbala bin stil insaid langa im eig. Nekdei olabat bin ol go en luk blanga jad laswan eig, bat wen debin kamad, jad eig bin krek, en jad laswan te:tul bin kamad bat jad lilwan te:tul nomo bin laik olabat, en jad majawan te:tul bin set, yu nomo maien beibi, yu rabiswan, dumaji yu gadem longnek. Burrum jeya debin ol libum im en deibin godan langa woda, en jad lil rabiswan te:tul bin rili sori bla im mijalp bobala, en imin krai.bat jeya. Wen imin binij kraibat imin godan langa woda, en imin luk mijalo langa woda en imin sei langa mijalp mi nogudwan orait en imin stat karai igin. Burrum jeya wanbala maja dak bin kam gadem ola im lilwan lilwan dak dak, en jad majawan bin asgim, wanem bla yu krai krai, en jad lilwan longnek te:tul bin sei, mt krai krai mijalp dumaji mi lil rabiswan te:tu. En burrum jeya jad lot dak dak bin gowei en debin gibgon najawei, en jad lilwan te:tul bin stat krai igin, bat burrum jeya thribala longnek te:tul bin kamad langa im. En olabat bin asgim im wanem bla imin krai krai en imin talem olabat, mi krai krai dumaji mi lil rabiswan te:tul, bat jad thribala bigwan te:tul bin talem im yu nomo lil rabiswan te:tul, yu lil purdiwan longnek te:tul wulijim mibala. Burrum jeya olabat bin gidim im en tegimbek langa olabat kemp, en jad lil longnek te:tul bin rili hepi gadem im nuwan femili. Stori Bla Krogidail Wan Setadei moning Reyila bin go swiming; bat imin oldei go gadem im ola ge:lfren. Bat distaim imin go mijalo, dumaji bla im ola ge:lfren bin go piknik gadem olabat mami en dadi. Wen Reyila bin bogi, en swim najasaid, imin faindem Krogidail bin silipbat la ola gras en mad. Reyila bin ran, en swim bek najasaid en imin jingad bla helb. Milija bin lisin wen imin trai go hanttng, en imin shudum gadem im raifol. Burrum jeya Milija en Reyila bin tegimbek jad Krogidail langa kemp, bla kugum en idim, gadem tu bala ola fren. Ola najalot pipul bin rili gud binji bla idim jad Krogidail, en debin gud binji bla Milija tu dumaji imin sebum bla Reyila. Stori Bla Tubala Olmen Wantaim tubala ol men bin lib langa wan ailen mijalo, tubala bin abum ron haus en ron ebrising tu, bat tubala bin kolem mijalp banji, en wandei tubala bin gadim bla tubala kino en tub ala bin go hanting bla tetul sapa, en tubala bin kambek aftnun wen imin faiba klok. Burrum jeya tubala bin silip en nekdei wen tubala bin gidap tubala bin luk wan kino bin kamab burrum naja kantri langa tubala, en tubala talem mijalp, ai rigin dijan sambadi wani kamab en gidim yunmi, jad wan olmen im sei langa jad najawan olmen, madbi tu jad naja olmen bin tok langa im. Jad bot bin kamad langa tubala na, bat jad men wen imin langa jad bot imin wondidwan madbi ala im kantri men bin fait langa im en imin ranawei gadem im bot bobala. Jad tubala olmen bin ran en luk langa jad bot en insaid langa jad bot tubala bin luk jad sikwan yangmen, en tubala bin gid‫im ‫im en tegimbek langa tubala kemp, en tubala bin lugabdum im til imin gid beda, en jad yangmen bin stop langa tubala olagija. Wel wandei big stom bin kam gadem bigwan win en jad thribala bin rili frait, dumaji jad thribala wani gid kil, en imin rili dagnait tu en wen jad thribala bin deid silip jad rein bin gowei na. Nek moning wen jad thribala bin wekap debin rili gudbinji igin en debin ran langa olabat bot bla go fising mo fis bla olabat, en olabat bin kambek imin aftnun la olabat kemp. Burrum jeya debin ol gobek gadem jad tubala yangmen langa jad ailen, en jad tubala olmen bin rili hepi wen tubala bin abum thribala yangmen blanga maidem tubala. Ebri taim jad tubala yangmen bin oldei go hanting en fising, en tubala bin oldei bringin bek langa jad tubala olmen en jad najawan yangmen wei imin oldei maidem tubala langa kemp dumaji imin oldei maidem tubala. Wandei jad thribala bin luk faiya sumok najasaid langa mein len, en jad thribala bin go gadem olabat kino bla go luk olabat, en debin luk naja tubala yangmen, bat jad tubala yangmen bin bla jad yangmen braja. Longtaim na jad thri bala yangmen bin maindembat jad tubala olmen, en wandei tubala bin rili olmen en nomo bin oldei wokabat enimo, oni tubala bin oldei jidan wan ples, bat ten wik taim jad tubala olmen bin dai na, en jad thribala yangmen bin gobek langa olabat on kantri langa meinlen. Fobala Yangboi Stori Wandei fobala yang boi bin go hanting rili longwei bla kenguru en bla imiyu en dijan fobala yangboi bin rili gud fren en debin oldei go hanting ebri dei. Debin go rili longwei langa draiwan kantri wei debin no eni woda ples en wan mo jad fobala yangboi bin go lilbit longwei igin en debin kamad langa wan bigwan bilabong. Debin drigim lilbit en debin eba res langa wanbala seidi tri en burrum jeya wanbala boi bin faindem sambala imiyu bin kamad bla woda. Burrum jeya imin wegimab bla im naja thribala fren en debin ol go bla kilim jad lot imiyu en debin kilim tubala imiyu. Debin go langa jad seidi tri wei debin eba res en dei bin kugum jeya en wen jad tubala imiyu bin kuk debin tegim bek langa olabat kemp bat jad kemp bin stil longwei bla olabat en debin megim kemp haf wei fo wan nait. Burrum jeya nekdei wen olabat bin gidab debin stat go hom igin bat haf wei olabat bin stop langa wan big bilabong bla abum dina en wen olabat bin binij dina debin gibgon langa olabat kemp igin en imin gulujab nait taim na wen olabat bin kamad olabat kemp. Burrum jeya wen olabat femili bin gibid olabat sambala yem debin gidimbat burrum ol olabat hanting jad fobala yangboi bin gibid olabat jad tubala imiyu wen debin kilim tu en olabat bin ol abum bigbala fit. Burrum jeya wen olabat bin binij idimbat olabat bin abum bigbala korobiri fo haf nait en burrum jeya olabat bin ol go bek langa olabat kemp bla silip. Stori Bla Gudubu Wantaim dijan lilwan kenguru nono bin laigim jidanbat wan ples. Wel wandei imin jingibat blanga ranawei langa najowan gudwan ples. Burrum je ya nekdei imin gidap rili alibala, en imin ranawei burrum im mami, dadi en im najalot femili wen olabat bin silip yeit. Wen bla im mami bin gidap im nomo bin woribat bla im lilwan beibi, dumaji imin rigin jad lilwan kenguru bin pleibat gadem najalot lilwan kenguru. Wel jad lilwan kenguru bin rili longwei na langa naja ples, en imin sangudan olawei tu, bat jad lil kenguru bin til gibgon, til imin faindem wanbala gudwan ples gadem loda grinwan gras en gud klin raning woda, en imin silip fo wan nait. Nekdei imin gidap en imin go naja ples, en imin kamad langa najalot kenguru, en imin stop jeya la olabat. Burrum jeya bla im mami, dadi, en najalot femili bin go bla logabat im bat olabat nomo bin faindem im yeit, en debin silip afwei fo wan nait. Nekdei debin gidap en stat logabat im igin, en wen imin gulujap dina taim debin kamad langa jad najalot kenguru kemp, wei jad lilwan kenguru bin stei langa olabat. Burrum jeya debin ol silip jeya wan nait gadem jad najalot kenguru en nekdei olabat bin tegimbek jad lilwan kenguru langa olabat on ples, en jad lilwan kenguru bin hepi gadem im olo femili igin. Stori Bla Yang Brolga Wan taim dijan yang brolga bin gowei en libum bla ola‫ im femili, dumaji im nomo bin laigim jidan bat wan ples. Burrum jeya imin kamad langa jad bilabong debin fobala Jebru, olabat bin logabat bla fis. Jad fobala Jebru bin asgim langa jad brolga wujei imin go, en imin talem olabat, imin jis kam bla wokabat dumaji imin nomo laigim jidanbat wan ples. Burrum jeya nek dei imin libum jad fobala fren bla im, ola Jebru, en imin gowei langa naja ples en kamad langa tubala tegi, en imin sllip jeya wandei langa tubala. Orait nek moning imin idim daga gadem jad tubala tegi, en burrum jeya jad yang brolga bin gibgon igin, en distaim imin kamad langa Imiyu. Wen tubala bin binij toktok, jad yang brolga bin libum bla im fren jad Imiyu, en imin flaiwei langa naja ples, bla logabat im najalot fren. Bat wen imin binij luk, en toktok im ola najalot fren, imin go bek hom langa ola im femili, bat wen ‫imin kamad langa imin ola femili, olabat bin abum big densing. Ista Holadei Wan Ista holdei taim tubala yangboi bin go bus hanting dijei langa Oenpeli Mission wei, en tubala bin go bla gus eig tu. Tubala bin abum on raifol, bla tubala dadi, en tubala bin go langa wanbala bigwan bilabong, en dei kolim jad ples redlili ligun, en jad ples im faib mail burrum Oenpeli Mission. Burrum jeya tubala bin sudum sambala gus, en tubala bin gidim sambala gus eig tu, en tubala bin tegim en kugum wansaid la bilabong langa wan bigwan seidi tri. Orait wen tubala bin binij kugumbat tubala bin idim sab sambala eig en tubala kukwan gus, en wan tubala bin binij idimbat, tubala bin godan la wan lilwan riba bla fis. Tubala bin kilim tubala lilbid bigwan badamandi, wanbala te:tul, en sambala lilwan fis, en tubala bin tegimbek la kemp. Wen tubala bin kamad langa tubala kemp tubala bin gibid jad lot gus eig, sambala gus, ala fis, en jad wanbala te:tul langa tubala mami en dadi blanga kugum. Burrum jeya tubala bin go abum shawa en tubala bin widim blanga tubala klin klous, en tubala bin go langa dje:j tubala bin gobek 1om, en tubala bin idim bla tuba la sapa, en afta sapa tubala bin go langa tubala bed, en reidi blanga tubala nekdei hanting igin.