PANTAM LA XALI
Story by MAGGIE MAGALGALA

Wularrut Tragos arrarrkpi awuling iwarruj nuyu Xali, malany waryat ja iwunguliny. La iwumurtpangung ja kiwken.

Rebeka la Tomas inyimany la yamin apa awani.

Ja kiwken iminy jita Rebeka kurrinypanawun inypamaju la arriwanon Xali.

Tomas iminy "Makiny," la inimarkujpan ja kiwken tuka nangartam.

Ja kiwken ilirrinyminy.
Iminy ta iwanarra warak tuka yungku nakapa ngumalal jita Rebeka.

Malany Jakob, ja awulingan Tomas, yuran tuka Pantam iminy nuyu pa awaliki.

Kayirrk la iminy ja Pantam,
"Nuyu la ngapi arrupanyarkpa jarrang pa arriwakataka warak."

Parang awungurrinang parak jarrang yanatjanat.

Angkatju ilirrinyminang. Yanat iminypu Rebeka la Tomas awamaju ngarrkarrk.

Jakob la Pantam amalkpangungka ta kurrampalk.

At purrungan nuyi la ngapi," iminy Jakob. Mata yungku wularrut kamala."

Ja kiwken iminy nuyu Tomas jita Rebeka inypaniwun inypanila ja Xali.

Marrik kiki la atpi iminy Jakob. "Arrkpanunman," iminy ja Pantam.

Awulatapakpan parak tuka murrku la luluj warrij pata awutayan pata wenatapa.

Amalkpany pata Tomas la Pantam la wularrut inyjumangung warak jita Rebeka tuka Xali.

Yarakap inyatpang manjawak ilangaling inyimirlajuning la inypanyen ta inypawani tuka Xali ngarlwak nuyu.

Ja Pantam inimany nuyu majarr ja ilangaling innyatpang manjawak.

"Wurrkaraka tuka yungku," iminy ja kiwken. "Kurrinypanama Rebeka," la yanat iwamaju.

"Yunyi kungputpirl," inyjajantiny Rebeka.

"Ankangalinga!" ilajantiny ja Pantam.

Pantam nuyu jita jarrang inyjurrang parak la inimany arka ja Tomas.

Inimany la angkuwukpirl wukara yanatjanat.

"Wurrkara kilangali tuka yungku," iminy ja Pantam.
"La arrinypanama Rebeka."

"Makiny! Makiny! Nginypanawun inypamaju!" iminy ja kiwken.

Parang ja kiwkenapa inimajpungkun ja manjawak la inypannyen.

Pantam ilurrang inyarlukpan ja Xali la inimurnanganiny warrwak ja arrarrkpi.

Xali mawarlkanyang parak.
Rebeka akutju angulpuniny wakapa tuka inypaning.

Tomas ingurriny parak inymany inyilagatpung tuka imawurr.

Arrarrkpi iwayantung ja iwajinpajiyiny la yung.
Marrik amurtpi nuyu Xali la ja kiwken pata arrarrkpi makiny.

Ja kiwken iminang mali iwannyen manjawak ja Pantam.

Pantam inimarkujpan murr mira. innyakan nuyu ja innyutpangung tuka yumpuli.

Ja Pantam inirnajkit ja kiwken. La Wurwiny nuyu kinrnarranyi.

Parangapa pata arrarrkpi kawulangali kiwuwutparr yanatapa ja iwumajkit.

Aminy nuyu, "Anpunpung wigarr arrarrkpi pata ngarri."

"Kurryakanyi yarranyi warak tuka yungku," aminy.

"Makiny," iminy ja Pantam. 
"Kiki apanamin Tomas?"

"Parang la iwamaju," iminy ja Tomas. 
"Malany ngarri wiyu ngarriwanawun."

"Kurryarutpanyi yanat wiyu iwanima warak rapij," aminyka yirrkaw.

Rebeka la Tomas inypanima la yamin la mulil angkanatpi.

Amparrkamparrk aminy marnmarr kangatpi ta nungmalal

Yaminapa kili itkit ja yaliwiyut awk ja kiwaka tuka rapij.

Used with permission King Features Syndicate, Inc. TM Hearts Holdings, Inc.