Japarra amintiya Yirrikipayi

Narrative - made up story

Marilyn and Marie Francis

Parlingarri wuta purumuwu Japarra amintiya Yirrikipayi kapi Paru. Api awarra Japarra puranji yimuwani yinkiti. Ngarra awarra Yirrikipayi yimi kapi Japarra, "Nginja nimpirimuwu kuriyuwu kapi yirrakunga api ngiya ngirimuwu kapi murrakupuni. Nginja tayapirrayapa," yimi Yirrikipayi, "pili muwa nimarra murimajirri," yimi awarra Yirrikipayi. Kiyi ngarra Japarra yinipapirrayi. Pakinya nimarra pirimajirri kapi tingata. Awarra Yirrikipayi yimi "Muwa muwuja kularlaga yinkiti." Kiyi purruwuriyi kularlaga. Awarra taringini pirripajingi wuta Yirrikipayi kiyi puruwarri. Kiyi ngarra Japarra yipakuluwunyi taringini amintiya Yirrikipayi kiyi kalikali yimi kiyi yuwunga arawinikiri kiyi yipirni awarra taringini api pajuwani yimi. Wuta wiyi kukunari pirimi kiyi purruwuriyi kularlaga yinkiti, awuta yuwurrara. Kiyi purruwunyayi yingarti yinkiti, wuninga, jipwajirringa, marinyi, yilinga amintiya yingarti piranga, jukwarringa. "Manya mujakupawurli japuja," yimi Yirrikipayi. Karri papi pirimi kapi japuja api pirripawumi yinkiti kiyi purruwapa. Wuta kukunari pirimi awuta yuwurrara pili mulukinya pirima kiyi purruwuriyi piyani. Waya juwa.