NGIRRAMINI NGINI ARLITIWIYI AMINTIYA KITIRIKA
KATRINA MUNGATOPI Juwakirimi

NGIRRAMINI NGINI ARLITIWIYI AMINTIYA KITIRIKA
Katrina Mungatopi Juwakirimi 
Ancilla Munkara jiyikiringirri yimanka
Nguiu Nginingawila Literature Production Centre 1980

Parlingarri awuta yanamuluwi japuja pirimi kapi ratuwati.

Ninkiyi awinyirra arlitiwiyi juwayorri kitirika ngini, "Murukuwuntirri", "Kuwa," jiyimi awinyirra kitirika,

Karri japinari jiyima awinyirra kitirika japuja yima tingata, amintiya awinyirra arlitiwiyi japuja yima warta.

Awuta yanamuluwi Pirripangari, ninkiyi pirripapirraya tingata.

Awarra tokampini amintiya pulangumwani purruwunga arlipurrunga kapi tingata.

Awinyirra arlitiwiyi jipangiraga ngini "Ngiya turumurruka, nginja yimpajinga". Awinyirra arlitiwiyi murruka jiyima, Ninkiyi awinyirra kitirika mamana jiyimamani kangi tingata.

Ninkiyi awinyirra arlitiwiyi jipakurluwunyi awinyirra kitirika ninganiwanga jinipangurlimayi karrampi.

Awarra arlitiwiyi juwunyayi marlani, ninkiyi jiyimajirripi awungarruwu.

Ninkiyi, awinyirra kitirika jinipangurlimayi awungarruwu kapi awinyirra arlitiyiwi jiyimajirripi. Ninkiyi, awunyirra kitirika karluwu nimarra jiyimi.

Karri waya yiminga jiyikingarti awinyirra kitirika papi jiyimi awungarruwu kapi awuta yanamuluwi kukunari pirimi ngini awinyirra kitirika, Awarra arlitiwiyi kutupi jiyimi, ninkiyi jipakurluwunyi awinyirra kitirika papi jiyimi japuja.