NURRUYANGGI ABALHU-WUY
Year 6/7
15 October 1996
Jagara Nundhirribala

Nurruyanggi Abalhu-wuy
Ngarra-Yulgi wangibajiyina warra-mijburrayung mabal maṉba.
Warra-mijburrayung wurruwiḏangi wirrimamangi maṉba.

Ngarra-Yulgi ngunubajiyini na-Yalumbu maṉba.
Na-Yalumbu nimanayi ama-maṉba.

Ngarra-Yulgi ngimawaṉagana mana-maṉba a-marang-duj.
Ngarra-Yulgi marri ngarra-Guyimamalang wangibajiyina maṉba 
warra-mijburrayung.

Na-Majuriyn nimanguyi mana-maṉba.
Ngarra-Ngaṉamugay wangibajiyina ana-muynjuj wulababidi adaba.

Ngarra-Ngaṉamugay ngiwuwurrurri anuḏangag a-muynjuj-jinyung.
Ngarra-Yulgi wangimagana warra-mijburrayung wangibajiyini a-muynjuj-jinyung marri wamarawanga-yinyung marri a-jiji-yinyung.

Ngarra-Yulgi wangibajiyina lhuyn.
Anani ana-lhuyn wangibajiyina warra-mijburrayung anubarriguḻag a-yalijalig-jinyung.

Ngaya anani Ngaṉamugay nga wulalana wubarriguḻag 
a-lhuyn-yinyung.
Ngaya anani Ngaṉamugay ngarrabajiyina manami mana-jingguḻiḻi warra-mijburrayung-guy nga anubani-yunggaj wirrimanguni mana-mamarriya manami mana-jingguḻiḻi.

Ngarra-Yulgi wangibajiyina manami jingguḻiḻi.
Ngarra-Ngaṉamugay ngiwan.gini ana-ḻagu.

Na-Wirijirri marri ngarra-Maṉarrbundu wuguniwiniwan.gini 
a-rangag-duj.
Ngarra-Yulgi ngimawaṉagana mana-gurrjaḏa mangumuṉbarrg.

Ngarragi Yulgi ngimawurruyina, manami gurrjaḏa nga warra-mijburrayung wirri manayi.
Ngarragi Yulgi wangibajiyina mangumunbarrg gurrjaḏa warra-mijburrayung-guy.

NUMBULWAR COMMUNITY EDUCATION CENTRE 1996